Wednesday, May 31, 2006

الحين محد عنده عذر مايعلق على مواضيعي :)ـ

والله الكورس الصيفي بو شهرين صج صج متعب .. اول مرة اخذ كورسات بشهرين وشكلها اخر مرة
صج صج ضغط بس الله المستعان كلها 29 يوم وبننشوي بحر العزيزة الغالية !!ـ
.
.
بمناسبة انتخابات مجلس الأمة الي على الابواب .. الحمدلله اني بلغت السن القانوني ..يعني اقدر اصوت.ـ
فندااااء الى كل المرشحين والمرشحات
الي يبي صوتي يدفع لي
" لحد يفهم غلط مابي ابيع صوتي ..اللهم بس ابي تذكرة ارد فيها بسسس "
طبعا بما اني اصلاحي وطني ودمي برتقالي فماتجيب راسي تذكرة بزنس ،ـ
فيرست ولا شيء غير الفيرست
اللهم الا اذا بزنس على البرتش فممكن افكر بالموضوع
وطبعا الويل والثبور وعظائم الامور للي يتجرأ ويدز لي تذكرة عالسياحية
لاخليه بيزة ماتسوى بكافة وسائل الاعلام المرئية والمسموعة و المقروءة بعد !!ـ
نستقبل عروضكم الى يوم الانتخابات
وحتى بعد الانتخابات مو مشكلة خصوصا واني مو مقيد بسجل الناخبين !!ـ
.
.
يعني صج صج حلاته تصير واحد يشتري صوتي واقوله بالاخير اخوي انا ما اصوت :)ـ
.
.
.
وندخل الحين بالموضوع
لاحظت في الآونة الاخيرة ان مواضيعي كلها مواضيع شخصية ماتقدم ولا تاخر
فقلنا نفيدكم اليوم بمعلومة جديدة او بالاحرى برنامج جديد ويهم كل واحد متابع لعالم المدونات والمدونين
.
كوني من رواد المنتديات القدامى .. لما انتقلت الى المدونات لاحظت عيب شرعي
وهو انك اذا تبي تشوف اخر التحديثات في مدونة معينة فلازم تدخل هالمدونة وتجيك بنفسك
واذا انت مهتم بعشر مدونات مثلا
تعال جيك هالمدونات كلها مرة او حتى مرتين باليوم " مثل حالتي " واخرتها بس مدونتين ولا ثلاث الي فيها تحديثات
يعني تخيلوا الوقت الي يضيع يوميا بالتجييك عالفاضي خاصة اذا كان الكمبيوتر مخرف وبطيء نوعا ما " ايضا نفس حالتي "ـ
.
.
كنت اتمنى ان يكون في مثل موقع تشترك فيه فيعطونك مثل مفضلة تضيف لها المدونات الي مهتم فيها فتدزلك ايميل كل ماصار تحديث باحدى هذه المدونات
.
وعلشان اكون دقيق اكثر .. طموحي كان هو اني اكون مبرمج هالموقع .. لكن نظرا لمعلوماتي المحدودة بهالمجال ولضيق الوقت فانسىىى !!ـ
.
قبل فترة شفت فكرة مشابهة واستانست عليها حيل
بهالموقع تقدر تجيك التحديثات على المدونات المشتركة اول باول
لكن عيبه هو ان مافي ايميل يندز وماتقدر تحدد المدونات الي مهتم فيها
يعني مو معقولة بتابع كل المدونات الي مسجلة معاهم لانها وااايد واغلبها خارج نطاق اهتماماتي
اضافة الى انها مقتصرة على المدونات الكويتية فقط
.
طولتها كالعادة لكن واخيرااا
البرنامج الي حل اغلب المشاكل الي فوق
.
.
بالنسخة المجانية من هالبرنامج تقدر تضيف 100 مدونة او اي مصدر اخبار يعتمد على تقنية
RSS
طريقته جدا سهلة
لما تضيف اي مدونة عندك خيار تخلي البرنامج يجيك التحديثات فيها كل نص ساعة او ساعة او يوم او حتى كل شهر .. حسب اهتمامك فيها
وعندك خيار تخلي البرنامج يطلع لك شاشة تنبيهية باي تحديث او حتى يطلع لك صوت تنبيهي " يازين صوت الساموراي .. حده يفشل اذا كنت تسولف بالتلفون و هو اشتغل فجأة :)"ـ
.
يعني قبل لا اركب هالبرنامج شوفوا عفيستي الي تصير مرة او مرتين يوميا

اما بعد البرنامج فشوفوا الذرابة

الشموس الي يم كل مدونة معناتها مواضيع جديدة

ولاني كنت توني فاتح البرنامج فطلع لي اخر تحديث منذ اخر مرة فتحته

طالع على اليمين تحت لو تلاحظون موضوع جديد بمدونة الباش مهندس :)ـ

طبعا اذا ابي المدونة تطلع بستايلها الطبيعي اقدر اضغط على اسم الموضوع وراح يطلع بستايله الاصلي

طبعا مافي برنامج من غير عيوب

اذا ودك تتابع التعليقات في اي موضوع فللحين لازم تجيك يدوي البرنامج مايقدر يدقق

اما بالنسبة للكفاءة فلاحظت ان على جهازي الي بينفجر من الفايروسات البرنامج ساعات يصير بطيييء ويغث

مادري يمكن يشتغل عدل على اجهزتكم

.

.

.

طبعا تقنية

RSS

هذي ثوررة كبيرة في عالم نقل المعلومات

ان شاء الله راح يكون لها بوست بروحها في نفسية افضل من نفسية الضغط الدراسي الحالي

والله احس اني ماني قادر ارتب افكاري الي بكتبها !!ـ

.

.

مع تمنياتي لكم بجولة رائعة بالبرنامج

والله يعينكم عالدعالة

عاد الحين محد يقول اعذرني ماعلقت عندك لاني مالاحظت انك كاتب شي جديد

البرنامج ينبهك اول باول

صحيح المفروض انا اخر واحد اتكلم لاني من ركبت البرنامج ماكتبت اي رد بمدونة ثانية

بس ماعليه .. محد شاف :)ـ

Wednesday, May 24, 2006

ثورة حتى التخرج !!ـ

السلام عليكم ورحمة الله وبركاته
.
.
اسبوعين مرت على اخر بوست لي في هذه المدونة الي صارت جزء لا يتجزأ من حياتي !!ـ
طبعا الشكر موجه لكل من سأل عنا وكل من فقدنا وكل من دعا لنا بظهر الغيب لان حدي محتاج لدعواتكم الطيبة
.
.
الحمدلله نتائج السنة الدراسية الماضية كانت نصر مبين وفتح كبير و الله اكبر فوق كيد المعتدي " بروف سوامي !!"ـ
سبحان الله قبل سنة كان اكبر هم هو اني اعدي من غير لا يحوشني انذار
والحين الهم هو كيف احصل على مكافأة التفوق --- > واحد يبي لاب توب بس مقحط :)ـ
.
.
بعد ظهور نتايج الفصل الدراسي المنصرم .. اندلعت شرارة الثورة المجيدة
" للاسف ربعنا هني ماحطو لون لثورتهم "
على كل البروفيسورات الفاسدين الذين يتآمرون ليل نهار لتسقيط الطلبة والطالبات ظلما وتجنيا دون وجه حق
هذا على الرغم من اني ما انظلمت ولا تضررت ولا اشوف ان الامتحانات كانت فوق المستوى المتوسط .. لكن لاني اثرت السلامة و ماحبيت اني اصير محسوب على فئة المفسدون في الارض اضطريت اني اركب موجة الثوار واثور على كل الظلام ابتداء بسوامي الي عطه نص الصف امتياز والنص الثاني سقوط فكان مصيره القلع والطرد من الجامعة الى غير رجعة .. يبدو ان السالفة فيها ان ..شكله واحد من ربعنا سيد واحنا ماندري !!ـ
.
.
شعار اما معنا او ضدنا اعتقد انه ظالم نوعا ما لكن هو المنتشر هاليومين في كل مكان وفي كل ثورة
ياترى كم واحد اضطر ان يكون في مثل موقفي في مختلف الثورات على وجه المعمورة !!ـ
.
.
اكثر جامعة في كندا ويمكن حتى بامريكا مهتمة بالسياسة هي جامعتنا ولا فخر
الي لاحظته خلال التسع الشهور الماضية ، وهي الفترة التي قضيتها هنا ، هي ان في طابق الميزانين من المبنى الرئيسي لازم لاااازم اذا الفلسطينيين حطوا طاولة يشرحون فيها قضيتهم تلقى يمهم على طول طاولة للاسرائليين
واذا الاسرائليين اقاموا مؤتمر عن بلدهم وبدوا يوزعون البروشورات عن مؤتمرهم تلقى العرب على طول مؤتمر مضاد وفارشين الميزانين قبور وكاتبين فوقها " صنع في اسرائيل " !!ـ
اذا العرب سوو مظاهرة بالشارع الاسرائليين على طول مظاهرة مضادة وتشابك بالايدي
الي يسمع يقول بجامعة تل ابيب مو كونكورديا !!ـ
كذلك في انتخابات الاتحاد الأخيرة .. شفت اهتمام مو طبيعي بالانتخابات نفس الوضع بجامعة الكويت
ماشفت هالشي كلش بجامعتي القديمة حيث اغلب الطلبة صينيين هناك مالهم شغل الا بالفلوس والدراسة!!ـ
المسلمين بتحريض اخونجي " مو كويتيين بس رابين بالكويت !!"ـ تحالفوا مع احد الاحزاب المحافظة ضد حزب تحالف الليبراليين واليهود
وتصير الصكة بالحملات
الليبرالين من حقارتهم قاموا يتمشون مفصخين بالجامعة عناد بربعنا
والمفاجأة ان بتواطء منهم مع ادارة الجامعة خلوا ربعهم يسوون قائمتين جدد باسماء مشابهة تماما لاسم قائمة ربعنا لكن مع زيادة كلمة وحدة فقط لتضليل الطلبة
وفعلا عقب يوم من بداية الانتخابات " الانتخابات تستمر ثلاث ايام "ـ
تم ازالة قائمة وحدة من القائمتين الوهميتين الي هدفهم كان سحب الاصوات
لكن الاصوات الي خذتها هالقائمة انلغت وراحت على ربعنا
يعني اشكره مؤامرة والدليل ان القائمة الثانية الي مالغوها حصلت 100 صوت بس ورئيسها شارك باحتفالات النصر للقائمة الليبرالية " يعني نصب عيني عينك "!!ـ
نجحوا بفرق 600 صووت مع ان ربعنا فازوا قبل شهر بانتخابات كلية الآداب والعلوم وهي اكبر كلية على الاطلاق بالجامعة
وكلية الهندسة طبعا محسومة لنا لان الغالبية الساحقة فيها مسلمين
انا كنت ضد اقحام الدين بالانتخابات وضد نظرية المؤامرة لكن عقب الي شفته بعيني اقتنعت بأن المؤامرة موجودة على اصولها .. هذوله يهوووود مو اي ناس !!ـ
.
.
يقولك في الستينات الطلبة حسوا ان الجامعة كانت عنصرية بتعاملها مع احد الاساتذة فعصبوا واحتلوا الطابق التاسع الي فيه لابات الكمبيوتر
سووها ثورة جد لمدة اسبوعين والجامعة ساكتة عنهم ومانادت الشرطة
لكن لما مصخوها يابت الجامعة القوات الخاصة فكردة فعل الطلبة حذفوا الكمبيوترات من درايش الدور التاسع وحرقوا الطابق بكبره مما ادى الى خسائر تقدر بمليونين دولار !!ـ
من الطرائف ان من ضمن المشاركين بالثورة المذكورة ناس صارت واصلة فيما بعد مثل رئيس وزراء دولة الدومينكان !!ـ
يعني هم غريب وهم ثاير .. انت شكوو ... وشكوو واحد مخرب مثلك يصير رئيس مجلس وزراء !!ـ
ذكرني بالي حاولوا يفجرون موكب الأمير عندنا !!ـ
.
كذلك ضمن التاريخ الدامي انه في التسعينات وفي نفس الطابق قام احد الدكاترة الي من اصل روسي بقتل اربعة من زملائه احتجاجا على تآمرهم ضده في اربع مناسبات كان فيها على وشك الحصول على عقد عمل في الجامعة مدى الحياة لكنهم كانوا عقبة بطريجه !!ـ
انا هني خفت حدي .. ربعنا طلعوا ما يغشمرون .. باجر لو سوامي يطيح على مدونتي انا على طول بروح من جيس اهلي !!ـ
المشكلة ان وايد اكون بهالطابق المشؤم .. ماكنت متخيل اني قاعد اتمشى في مسرح ثورات وجرايم خطيرة جذي !!ـ
.
.
اخر ثورة شهدتها جامعتنا كانت سنة 2002 لما نتينياهو كان المفروض يلقي كلمة بالجامعة بدعوة من الطلبة اليهود
يقولك صارت افلام هندية .. اعتصامات ومظاهرات لايام متتالية قبل لا يوصل
هذا غير احتلال المبنى من قبل ربعنا ومنع اي واحد من الدخول مما ادى الى تاجيل المؤتمر مع اجرائات مشددة اكثر
وفعلا طلبت الجامعة القوات الخاصة وصارت الاجرائات مشددة اكثر لكن ربعنا كان نصهم داخل المبنى ونصهم برا " ما كانوا يدرون بالموعد الجديد " ـ
لكن لما دروا بدا الطق وبدا التخريب
ولما مصخوها قاموا يكسرون الزجاج الرئيسي الي بالطابق الارضي " عندنا مافي طوفة لا يعني كشخة حاطين زجاج " ـ
فالي برا قاموا يدخلون ليما تعقد الوضع فرشت الشرطة الغبية الغاز المسيل للدموع الي تسرب الى اجهزة التكييف مما ادى الى اخلاء المبنى وبالتالي الغاء المؤتمر
يعني بالنهاية صج كذا طالب انفصل وتحاكم ولكن ثورتنا انتصررررت مو مثل بعض الثورات :)ـ
.
.
شكلي نضلت روحي
كل ما اشوف واحد كنت اقوله اني باخذ هالصيف كورس واحد بس لانه مافي مواد
فالبتالي فاضي وماعندي شي
اول صدمة كانت ان المادة الي ماخذها دسمممة بمعنى الكلمة
تعتمد على مواد درستها بالماضي السححييييق ووين اتذكرها
والدكتور يكتب بسرعة البرق ويتكلم اسرع بشوي
يعني انسى تلحق معاه
.
.
والصدمة الثانية هي اكتشافي المتأخر جدا الى ان ميولي هي سوفتوير وليست هاردوير
ذاك اليوم عقب مانبهني واحد من الشباب الي يدرسون ماجستير الى اهمية مهندس السوفتوير والى ان الطلب عليه زايد بسوق العمل عندنا
قلت لازم ابحث بالموضوع
عكفت جدام الكمبيوتر يومين اقرا بالمقالات والمواقع من الصبح الى الليل الى ان اقتنعت كليا الى اني سوفتوير ولا شيء سوى السوفتوير
مايعني اني لازم اغير جدول موادي للسنة القادمة
التغيير كان جدا عسر لقلة المواد المعروضة وتضاربها
وماقدرت ارقع اي جدول الا اذا اخذت مادة ثانية هالصيف
سجلتها في اخر يوم للسحب والاضافة وكان احد اي عطلة
وثاني يوم على طول لاب وانا مادري المادة عن شنو اصلا ولا ادري وين الاب
دزيت ايميل للبروف عطاني سيفووون
داومت الصبح الساعة تسع عند باب المكتبة اول مافتحت شريت دليل الاب
بعدين رحت سالت عن مكانه
بقى عندي ساعة الا ربع اقرا عن التجربة الي المفروض الحين اسويها
صدددددمة .. التجربة عن موضوع ما اواطنه بعيشة الله ومعقدني صارله سنين
ثيرمو دايناميك والعياذ بالله
شلون بفهمه بنص ساعة تحبطت على الآخر
لكن الله سهلها
طلعت اسخف تجربة بالتاريخ .. كل شي موصل وجاهز وكل الي علي هو اني اشغل مولد الكهربا واقيس تغير درجة الحرارة كل دقيقة لمدة ساعة ونص
يخرب بيت السخافة !!ـ
.
.
في كلام وايد بعد ودي اقوله لكني بصراحة مابي اطول عليكم زيادة
ولاني ايضا تعبااان
هاليومين شوية متكدر
رديت من المحاضرات قلت احسن حل هو اني امسك اوراقي واكتب كل همومي
فعلا كنت صريح مع نفسي وكتبت كل شي بخاطري
حسيت اني فرغت وارتحت
فالخطوة التالية كانت وضع الحلول على المدى القصير والطويل لهذي الهموم
على المدى القصير قلت احط جدول لتخليص العاجل من الامور
صار الجدول على شكل عمل متواصل الى تاريخ 12/6 .. هذا بس العاجل من الامور !!ـ
صج بعد ماضفت هالمادة صرت مشغول عالآخرررررر
ضغط مو طبيعي مادتين دسميين بشهرين
يعني الحين المفروض ان خلصنا نص المنهج وللحين ماندري شالطبخة
لكن انا واحد استخرت وارتاح قلبي للهطريج فلابد ثم لابد اني امشي عليه وربي بيساعدني
.
لانها ثورة حتى التخرج !!ـ
.
.
.
.
.
.
.
.
.
.
إذا المرء لا يرعاك إلا تكلفا ** فدعه ولا تكثر عليه التأسفا
ففي الناس أبدال وفي الترك راحة ** وفي القلب صبر للحبيب وإن جفا
.
إذا لم يكن صفو الوداد طبيعة ** فلا خير في ود يجيء تكلفا
ولا خير في خل يخون خليله ** ويلقاه من بعد المودة بالجفا

Tuesday, May 09, 2006

وداعا يا شتاء

وداعا يا شتاء برد قارص
وداعا يا شتاء ليل دون آخر
وداعا يا شتاء جد ودراسة
وداعا يا شتاء امتحانات ومهانة
وداعا يا شتاء بيات ونوم
وداعا يا شتاء ذل و صمت
وداعا يا شتاء كبت و حزن
وداعا يا من كبل أيامي
وداعا يا من ضيع آمالي
وداعا يا من صار ماضي
وداعا إلى لقاء قريب !!ـ
.
.
.
.
.
واخيرااا انتهت الامتحانات السبت الماضي معلنة انتهاء عام دراسي وشتاء إلزامي آخر
أعاننا الله على ماتبقى منهم !!ـ
.
لما بديت اكتب هالبوست ماكان على بالي اني اكتب الخاطرة اعلاه لكن الجو الجميل الظاهر له تاثير على خلايا المواهب
الأدبية والله العالم
طبعا الي يقرا كلماتي وهو بعز الخيسة يمكن يستغرب لكن هذا هو الواقع
قبل شهر بس بدا فصل الربيع عندنا
الدنيا برا ربيع والجو بديع
الخضرة كل مكان والهوا البريدات يخلي الواحد يحس انه عايش حاله حال غيره من البشر
الله يرحم ايام الثلاثين تحت الصفر
دببة مو بني آدم !!ـ
حتى الإبداع الي يطلع بالشتا يطلع لونه أسود !!ـ

ـ" المنظر الي فوق كان صورة خذيتها من دريشة شقتي اول مرة ينزل فيها ثلج شهر 11 الماضي "ـ

وبما ان هالصورة كانت ومازالت خلفية لجهازي فلكم تتخيلون حجم ضيقة الخلق المختزنة بالعقل الباطن

.

المهم ان هالصيف ان شاء الله شهرين جالس على مادة وحدة للأسف ماكو غيرها ومن ثم شهرين بخيسة الكويت

وبما اني قاعد على مادة وحدة فهذي راح تكون الفرصة الذهبية للهياتة والاستكشاف وتنمية المواهب

كنت مفكر اخذ دورة بالفرنسي وازددت حماس للدورة يوم الجمعة الماضي

كنت سهران طول الليل بحجة الدراسة .. لكن الواقع يقول اني اخر ساعتين من الفراغة غسلت الصحون وتسبحت وقعدت اقرا الجرايد :)ـ

نمت ثلاث ساعات وقمت بمعجزة قبل الامتحان بساعة

الشباب كل واحد جنطته بظهره متروسة ملفات وكتب .. ماسك دفتره بايده ويراجع إلى اخر لحظة

اما حضرت جنابي فداش الجامعة فايق ورايق

لا جنطة ولا كتاب ولاشي .. طرق جم قلم وسماعة الايبود باذني والابتسامة شاقة الويه

يقولك رايح رحلة مو امتحان :)ـ

الطموح تسمع اغاننني من الصبح ؟؟ .. ياجماعة تكفون انا ويهي ويه اغاني :)ـ

السالفة ومافيها اني بهالطريقة احاول اني ارخي نفسي قدر الامكان علشان ما اتوتر حزت التقديم وازفت باسئلة سهلة

عند باب القاعة يمر شيبة متبتب يتبوسم ويقول لنا بونجور ميسيو " يعني صبحكم الله بالخير يا الربع بالفرنسي " ـ

كنا ثلاثة خليجين ..واحد قاله هاي والثاني ولكم وانا بما اني مفهي قلت له : هلااااا واللله يا الله حييه :)ـ

واحد قالي : صج انك قوي

انا : يامعود شدراني عنه تلقاه سبنه واحنا ماندري !!ـ

فجأة التفت الشيبة وقالي بالانجليزي : بالمناسبة ترا فهمت انت شنو قلت .. مشكور وماقصرت !!ـ

انا اهني حددي الي انبعصت : نعم ..صج والله فهمت " واضحك يعني برقع "ـ

هو : اي فهمت مشكور وماتقصر

انا : " مجرد ابتسامة بلهاء "ـ

لما وخر شوي والا اتذكر ان هذا البروف الخليلي .. فلسطيني يدرس السكشن الثاني

اوووووبس شخربطت انا اليوم شكلي كنت مريح بزيااادة

عاد الشباب حق الشماتة قالوا لي خلاص حطك بباله ..انت ساقط ساقط :)ـ

عاد هالدكتور يقولون انه احسن دكتور بالجامعة والكل يبي يطب عنده .. مو حلوة اطب عنده ويحقد علي .. ان شاء الله بالصيف ينسى ويفكنا :)ـ

وعلشان هالموقف وغيره من المواقف البايخة الي اتفشل فيها لاني ماعرف فرنسي افكر جد اتعلم هاللغة وافتك من الطلايب :)ـ

.

.

السبت كان اخر امتحان لي .. خلص الامتحان خمس العصر وعلى طووول سفر من الجامعة الى المدينة الثانية من غير حتى لا نرجع شقتنا !!ـ

عندنا عطلة يوم واحد " الاحد " بين الكورس الثاني والصيفي .. كثروووووو ماشاء الله .. الله يجزاهم الجنة على عطلتهم العجيبة !!ـ

ولاستغلال هاليوم اليتيم قلنا نسوي زيارة لاخواننا في الله بمدينة تبعد ساعتين عن مدينتنا

المدينة الي رحناها حدها كئيبة ومافيها شي غير الشباب الي متكودين هناك بالهبل

وبما انهم وايد فصايرين مجاميع قومية ومذهبية وانتمائية وعشائرية الخ الخ الخ

غالبا كل مجموعة مالها شغل بالثانية

انا ربعي مجموعة وربع رفيجي الي مسافر معاه مجموعة ثانية

سلمت على ربع رفيجي.. خوش ناس .. قعدت وياهم وبالليل رحت للربع

.

.

ضاق خلقي .. كل واحد متهاوش مع الثاني

تحسرت .. انسى صلاة الجماعة واحمد ربك اذا احد قام صلى

اختنقت .. الي ماكان يدخن قام يدخن .. والي يدخن قام يدخن بزيادة

اشمئزيت .. الشباب صايرين فري بزيادة عن قبل

شلل مختلطة وصور بريئة

عن الحلال والحرام وعشان ما احط بذمتي .. اغلب البنات محجبات ومحترمات بس مافي مشكلة يلعبون كرة سلة ولا يقعدون بالكوفي مع الشباب الي بعضهم المفروض ملتزمين ومايسمعون حتى اغاني !!ـ

تناقض ما قدر مخي يستوعبه

ضاق خلقي وحسيت اني برجع من هالزيارة مثل كل مرة متكدر اني ماسويت شي

لكن باخر ليلة الحمدلله كسرت القاعدة وسويت اقل شي ممكن

من حق اخواني علي اني انصحهم فحاولت بطريقة غير مباشرة

وزعت سيديات المفروض انها اناشيد تونس لكن دعست بينها جني مادري شوية محاضرات وشوية تلاوات

اضافة الى مطويات عن اضرار التدخين وقسوة القلوب واهمية الصلاة وغيرها

حسيت براحة نفسية كبيييرة بعد ماوزعت هالشغلات

اذا ماكانت عندي الجرأة اني انصح اشكره واخاف اني اجرح اي واحد فعلى الاقل انصحه بطريقة غير مباشرة

ولا اني اصير عامل سلبي وبس اتحلطم واتحسر من غير لا اسوي اي شي لتغيير الواقع

.

.

هاليومين طلعت لي شوية اشغال يمكن راح تخلني اقلل من كتاباتي

لكنها اشغال من النوع الممتع والي الواحد يدورها دوارة

ان شاء الله اذا نجح المشروع الي قاعد اشتغل عليه راح اعرضه لكم

لكن لا سمح الله ان لم ينجح فكان الله غفورا رحيما :)ـ