و بدأ ماراثون انطبخ

ها أنا ذا أعود مع حصاد أو يوم في حملة الطبخ العالمية في شقتنا حفظها الله ورعاها

طبعا تلاحظون اني يوم عربي ويوم انجليزي مشتت ... لانه مخي بكبره مشتت هاليومين الله يستر علينا

بما اني البارحة قليت برجر وبطاط ومن اليوع نسيت لا اصور

وبما انه اليوم احتمال اسوي فول ... مايسوى الواحد يصوره

قلنا نبدى بطبخة اول امس الي كانت بحق شي محترم وانجاز يضاف الى سلسلة الانجازات العظيمة في مجال المطبخ

" شيش طاووق بالفرن عالطريقة الطموحية "

طالما اشتهيت اسووي شيش طاووق بالبيت لكني ما اعرف الطريقة

لكن بحنكتي ودهائي تذكرت انه الشباب لما يشوون دجاج بالمخيمات والكشتات يكونون ياييبين جدر في دياي متبل بالبيت ... الله يعافي حريمهم طبعا

اذن كل المطلوب هو اني اتبل الدياي واحطه بالفرن ...اذكر الوالدة الله يحفظها عطتني تتبيلة خاصة حق مكرونة الفريدو لكن هذي تكون شوية حالية وماتصلح لشوي

فكانت الوصفة التالية المعدلة لتتبيلة الطاووق الطموحي :ـ

بعد ماتتنظف الدياية وتتقطع تنحط في بادية فيها :ـ

ماي

لومي اسود مدقوق او ليمون اذا لم يتوفر

ملح

فلفل

صويا صوص

كاري

مكعب خضار ماجي

ثوم بودر

خل " نسيت لا احطه للاسف "ـ

بعدين تخلون الدياي يسبح ويمرح في الصحن ليلة داخل الثلاجة

ثاني يوم ينشال الدياي وينحذف على ويهه بالصينية البايركس الي تترك لتنشوي بالفرن نص ساعة على درجة حرارة متوسطة مع التقليب من فترة الى اخرى

وبعدين تمتعوا بالدياي العجيب

طبعا يفضل لو فيه سيخ ينحط فيه الدجاج علشان يطلع كانه مشوي

ولو في شواية يكون هم احسن واحسن

والي وده يعيش الجو جنه مسوي باربيكو ...قريت مرة بموقع طبخ النصيحة التالية :ـ

" سيدتي ..اذا اردتي ان يكتسب طبقك رائحة الشواء ...ضعي فحمة بالفرن وتمتعي بالرائحة الجميلة "

لكن بما اني لست سيدة وبما اني مو غبي اقص على روحي بروحي فما نفذت النصيحة :) ـ

طبعا لازم شوية شغلات عشان تكتمل الطبخة

العيش .... الله يخلي جدر البخار ... عيش وماي مع مايتبقى من التتبيلة المائية الي سبح فيه الدجاج ليلة كاملة بالثلاجة

ربع ساعة والعيش جاهز

والحمسة ...شوية زيت بالجدر ...احذف " سيدي العزوبي الفاضل " فيها الخضرة الي تشتهيها من فلفل اخضر وبطاط وبصل وطماط وجزر مع ملاحظة انه البطاط والفلفل الاخضر يحتاجون وقت اطول علشان يستوون فيوضوعن قبل المكونات الاخرى

وهذي صورة الطبق ...مع ملاحظة انه الشي الابيض الي وارم هذا عيش مو كيكة يزر ...يبدو انه ناقصه شوية ماي فطلع ناشف

ويمكن شكل الاكلة يطلع احلى لو انخلط الدجاج مع الحمسة لكن هم مو كل الناس تحب الخضرة

وبالهنا والشفا