عدنا والعود ... مثلج " مثل مونتريال " !!ـ

بسم الله الرحمن الرحيم

وبه نستعين

كح كح كح

اهي غبرة طلعت من هالمدونة

اهي بلاوي زرقة لقيتها محذفة مني ومناك وانا قاعد ارتبها

والله ما كان ودي اهد المدونة وعالم التدوين كل هالفترة الطويلة هذي

لكن فجأة بدا عندنا الشتا ونزل الثلج معلنا فترة البيات الشتوي للدببة والثعالب والارانب والغزلان ... والمدونين أيضا !!ـ

اهو علشان ما أرقع وايد الي صار هو اني انشغلت بالدراسة والكآبة من الجو التعيس الي عندنا

فلقيتها فرصة لي اوقف فترة عن الكتابة بالإنترنت بشكل عام أراجع فيها نفسي وافكاري وأهدافي من وجودي في هذا العالم

لفترة حسيت أن أوراقي مكشوفة زيادة عن اللزوم

يعني مثلا .. ربعي كلهم يعرفون المدونة ويدخلون انويميس " البركة بالي يخلي نيك نيمه بالمسنجر عنوان مدونته !!"ـ

اختي الصغيرة قبل فترة اكلمها بالتلفون تقولي ليش موقعك مسكر " ماني خابر حاط صور باربي بموقعي علشان تهتم فيه !!"ـ

صج يهال اخر زمن " اشوه استوعهبت بعدين انه قصدها موقعي القديم "ـ

يعني باختصار الواحد ما يقدر يقول كلمه الا انمسكت عليه فلازم يكون حذز وفطن وداهية مثل الثعلب

وبما اني كتكوت وأليف والي بقلبي على لساني فما اقدر اجيد الدور

ففكرت اني اكتب بنك نيم جديييد من الوكالة وما اعلم احد خير شر

وفعلا اخترت لي اسم رومانسي " احم احم " وطلعت ايميل جديد وبلشت اكتب

لكن ماطولت اسبوع واحد وبعدين قلت لنفسي

انا ليش احاول اتخفى ؟؟

قاعد اقول شي غلط ؟؟

المثل يقول لا تبوق ولا تخاف

فمن هذا المنطلق النبيل قررت العودة للكتابة بنك نيمي القديم وعلى المكشوف

والي براسي يطلعه كيبوردي

-----------------------

بما ان الكويت تعيش بركات العهد الجديد

قلت لازم اعيش الدور و ابدا العهد الجديد بمدونتي

اول الغيث هو النيو لووك الي ان شاء الله يعجبكم

اهو مو عاجبني وايد لكن اهم شي هو التغيير

التغيير بالكويت لازم يكون حلو حتى لو كان إلى الأسوأ !!ـ

ثاني بركات عهدي الطموحي الجديد هو تغيير خط سير المدونة الي تسير عالبركة !!ـ

لاحظت اني من غير لا احس مدونتي بآخر الأيام كانت عبارة تفريغ لمشاعر مكبوتة وآمال مقبورة وخرابيط مدفونة

بحاول ان شاء الله بالمستقبل اخلي المدونة متنوعة فيها فائدة للقاريء " حيث ان كتابة الهموم تضيع وقت القاريء والكاتب معا !!"ـ

في عدة شغلات حلوة ناوي اكتبها بالمستقبل

اتمنى اني القى لها الوقت والقدرة والمساندة !!ـ

------------------------------------

إلى كل من تحمل هذرتي ووصل إلى هذا السطر

جزاك الله خير

وحياك الله في مدونتك

وإليك هذا الإهداء البسيط