خلي عندك شوية يقين

الكآبة قبل يومين طقت العداد !!ـ

مزفت بمدتيرم سيء الذكر " سوامي " وكان عندي متديرم كالكلس 3 مساء الخميس وانا مو متدرب عدل

الأصدقاء البشريين غدارين وناكرين للعشير .. كثر ماتغفل غلطاتهم وزلاتهم مايرحمون غلطة او هفوة منك

مالك بهالدنيا غير من صدق فيه قول الشاعر : صديق صدوق صادق الوعد منصفا

ومن غيره الأيبود ...صديقي الالكتروني !!ـ

.

.

اييييي يا ابودي العزيز .. شكثر طحت مني وشكثر تعورت ولا قلت اي

شكثر طيحتك من السلم الكهربائي بالجامعة لتتدحرج من طابق لي طابق ولا قلت اح

شكثر سافرنا وعبرنا جبال وانهار ووديان ومحيطات

اييه صج هذا الصديق الوحيد الي رافقني بكل سفراتي وماتخلى عني مثل باجي البشر

اهي ذكريات لنا انا وياك .. باصعب الاوقات واحلك الظروف كنت دايما تسلني وتواسني

احطك على التشغيل العشوائي وانت بذوقك الحلو تحط لي الشي الي يضبط لي المزاج

ان كنت متكيسل حطيت لي نشيد حماسي وان كنت يائس حطيت لي نشيد ايماني وان كنت مقهور حطيت لي تلاوة ولا اروع

وان كنت فرحان حطيت لي نقازي وانت كنت زعلان حطيت لي رومانسي " نشيد رومانسي يعني على انغام الرشاشات ... كاك :)"ـ

.

.

قبل يومين جابلت الكتاب ساعتين ولا قدرت اقرا كلمة

في قمة الإحباط

مغير اردد بيني وبين نفسي نشيدة لها معزة خاصة في نفسي

شغلت الايبود على الوضع العشوائي

نشيدتين الثالثة الا هي نفسها الي ارددها " من بين ثلاثمية مقطع في المفضلة " ـ

سبحان الله حسيت براااحة

امسك الريموت واعلق ايدي على الدقمة ابي اطول الصوت

اضغط واضغط واضغط الى ان علق الجهاز !!ـ

شالسالفة عسى ماشر شصااار ؟!ـ

اطالع ولا انا بسلامتي كنت اضغط بالغلط على دقمة تغيير المقطع مو تغيير الصوت مما ادى الى ادخال الجهاز في حالة الغيبوبة

يعني شنو ؟؟ يعني الجهاز انتحر ..انتحرررررر

حاولت انقذه بالتنفس الاصطناعي " فورمات " حاولت اوصله بالاجهزة " الكمبيوتر " ولكنه مصير كل حي

" إن العين لتدمع وإن القلب ليحزن وإنا لفراقك يا ايبود لمحزونون "

كييييف اقدر اعيش من غيرك كييف ؟؟ـ

منو بفزع معاي من صباح الله خير " 2 الظهر " ويونسني بطريج الجامعة ؟؟ـ

من راح يرد معاي البيت بانصاف الليالي ويواسني على الكلاس المتخلف الي يخلص 11 بالليل كل اربعا ؟؟ـ

من راح يعيني على الحفظ والمراجعة ؟؟ـ

من ومن ومن يملي مكانك ممممممن !!ـ

.

.

بعد يومين انتهى العزا وبما ان الموت حق خذيت الجهاز للشركة الي شريتها منهم

وبما انه عالكفالة فالمفروض اما يصلحونه او انهم يعطوني واحد ثاني بظرف ايام قلائل

كلمتهم وشرحت لهم الوضع قالوا عطنا بياناتك وتعال عقب اربع اسابيع عمل

قلت لها شنوووو عيديييي ... اربع ايام عمل ؟!ـ

قالت لي ...أربع أسابييع عمل مو ايام !!ـ

قلت لها عيل شحقه دافع دم قلبي علشان كفالتكم " المميزة " ..شفرقت عن كفالة الوكيل

انا دافع لكم مبلغ اغلى من الشركات الثانية بس علشان كفالتكم الي تدعون انها فورية وماتاخذ يومين بعكس كفالة الوكيل الي تاخذ لها اسابيع

قالت لي ببرود شديد ..هذي مو غلطتنا هذي غلطة المحل الي شريت منه الجهاز لانهم ما فهموك عدل نظام الكفالة .. اذا عندك مشكلة روح تفاهم معاهم " جنها ماتدري انه ذاك المحل علشان اوصله يبيلي اربع ساعات طيران بسسس " ـ

وبما اني واصل حدي ومالي خلق نجرة عطيتها نظرة حقد طويلة وقلت لها ببرود اشد من برودها

آسف .. انا الغلطان الي شريت منكم

ومشيت بكرامتي

لكن بيني وبين نفسي مابقى احد من اهلها ماسبيته او دعيت عليه

قعدت افكر بكل الاسباب الي ممكن ترجع لي ايبودي او خليفته الجديد باسرع وقت ممكن

فكرت افضح هالشركة بالجرايد

فكرت اشقهم شق بالتلفونات

فكرت ادز ايميل حق الكاستمر سيرفس الرئيسي مالهم واشخلههم .. اقولهم كنت ناوي اشتري منكم لاب توب وكنت دايما انصح ربعي بس الحين هيهات

اي سويت هالحركة من قبل مع شركة ثانية ودزولي اعتذار وتعويض وبلاوي .. بهالديرة الناس تقدر التحلطم !!ـ

ياني احساس شبه يقيني ان هالحركة راح تثمرعن شي سواء الي ابيه او يمكن اكثر كتعويض !!ـ

.

.

وقعدت افكر بهالحلول الأرضية

جان اقول بيني وبين نفسي

الحين تعلق نفسك بالاسباب ونسيت مسبب الاسباب ؟!!ـ

ويييين " الذين اذا اصابتهم مصيبة قالوا إنا لله وإنا إليه راجعون "ـ

وين " حسبي الله ونعم الوكيل "ـ

ويييين " رب آجرني في مصيبتي واخلفني خيراً منها " ـ

صج الكلام عن المثاليات سهلل لكن وين الي يطبقون

" إنما الصبر عند الصدمة الأولى "

مو بعد ماتسب الموظفة ووالدين والديها وتبرد قلبك

.

.

بقية الأحداث " العجيبة "ـ

تتبع إن شاء الله لأني كالعادة كتبت أكثر مماكنت مخطط أكتب بكثييييير

إلى كل الي تحمل قرقتي الي مالها معنى ووصل إلى هالسطر

شكرا من القلب على اهتمامك ولا حرمنا الله من زيارتكم ودعاؤكم

دنياك تزهو