شكلي صج خرفت !!ـ

صارلي جم يوم ببالي جم موضوع لكن مافي فرصة

كل ما اقعد جدام الشاشة يحوشني صدااع يزداد كل ماقريت موضوع طويل ومشفر " يعني اذا ماعلقنا عندكم سامحونا ترا الموود مايساعد "ـ

.

.

كنت ناوي اكتب موضوع عن طلعتنا البارحة لكن بما اني متزاعل مع رفيق الدرب الي طلعت معاه فماني كاتب الا لما يحس على دمه ويعتذر .. طبعا كردة فعل فكرت اني اكتب عن سبب الزعل لكن قلت مالنا خلق حش خاصة وانه ابو الشباب يعرف لنك المدونة .. " يعني اذا شفتوا المدونة اوف لاين يعني ترا مو مني "ـ

فكرت اكتب عن ايبودي الي رجع الي اخيرا وهو فاقد الذاكرة بشكل كلي .. احسن علشان مايتذكر خيانتي له :)ـ

بعدين فكرت اكتب بوست من سطر واحد كالتالي :ـ

.

.

My current mode = - cos ( t ) ; MON <= t <= FRI

.

.

طبعا بما ان نص الزوار ماراح يفهمون شالسالفة فقلت ارسم الدالة الي فوق علشان توضح انه مزاجي يوم الاثنين كان واحد تحت الصفر ثم بدا يصعد الى الصفر يوم الثلاثاء ثم الى الواحد يوم الاربعاء ثم الى الصفر يوم الخميس ثم الى واحد تحت الصفر مرة اخرى الجمعة

.

.

وانا قاعد افكر شلون برسم الرسمة قلت ببالي وشلون على مدى الدالة هل راح يكون عالي ولا واطي .. يعني هل الرسمة البيانية لما تشير الى اعلى نقطة و أوطى نقطة هل شرط انها تكون واحد ام اخليها 2 ، 3 ، 10 ، 600 ؟؟!ـ

.

هني لمعت " حلوة هذي لمعت " في بالي فكرة جهنمية

قلت جذذذي يبرمجون الروبوتات الي لها ذكاء اصطناعي

.

يعني مثلا اذا الروبوت رجل فيبرمجون مزاجه العام بدالة ذات مدى منخفض " يعني تكانة مايتغير مزاجه بشكل كبير "ـ

اما اذا كان مرأة فيصير مزاجه عبارة عن دالة ذات مدى مرتفع جدا و تردد بطيء " يعني المزاج يتغير بشكل كبير لكن ببطيء نوعي "ـ

اما اذا كان الروبوت طفل فيكون مزاجه عبارة عن دالة ذات مدى مرتفع حيل وتردد سريع حيل " يعني مزاجه يتغير بسرعة وبشكل كبير "ـ

.

.

هني سرحت بخيالي .. قلت علشان نطور هالبرنامج البسيط بحيث ممكن نخلي الروبوت يتأثر بالبيئة الي حواليه .. يعني لو سمع اصوات ضحك نضرب الدالة مالت المزاج عنده برقم معين بحيث تخلي المزاج يتعدل .. وكل مازادت قوة المؤثر زاد تأثير العامل الي نضرب فيه الدالة

وكذلك نفس الشي بحالة سماع اصوات مخيفة او صراخ لكن باثر عكسي

.

.

بعدين تطورت الفكرة اكثر الى ان نخلي الروبوت له القدرة على التعلم الذاتي

يعني يبدا الروبوت والذاكرة مالته فاضية مافيها غير الاوامر الرئيسية حييل مثل ان الضحك شي زين والبجي شي مو زين اضافة إلى دالة المزاج الخاصة فيه

.

اذا سمع اصوات ضحك او وناسة يحاول يسجل في ذاكرته كل البيانات الي كانت متواجدة لحظة سماع الضحك

يعني يسجل الصوت الي سمعه

ويسجل الريحة الي شمها

ويسجل الوجوه الي كانت موجودة

ويسجل نوعية الإضائة والجو وغيرها من البيانات الدقيقة

فبجذي يبرمج نفسه انه اذا تجمعت كل هالعوامل المسجلة في الذاكرة والمرتبطة بالضحك فلازم يضحك .. واذا تكرر الموقف اكثر من مرة وتكرر سماع نفس الكلمات او كلمات قريبة فيبرمج نفسه انه يردد نفس الكلمات

" اول مرة احس ان مقرر علم النفس الي خذيته كاختياري في من وراه فايدة "

.

يعني بالضبط نفس ياهل صغير توه منولد ويتعلم من امه وابوه

وبعدين يكبر " بعد ما تزيد المعلومات الي مخزنها بذاكرته "ـ

فيروح المدرسة ويتعلم ويطلع من الأوائل !!ـ

.

فهني زادت الاحلام وقلت ليش ما ناخذ العقل الإلكتروني هذا اذا سويناه ونركبه على شاذي ولا قطو !!ـ

هل ممكن نشوف بالمستقبل شاذي الكتروني يتكلم ويمشي مثلنا !!ـ

.

.

طبعا مشاريع مثل هذي لا يمكن تعتمد على جهود شخص واحد او شخصين .. هذي محتاجة طاقم عمل من مهندسين وعلماء نفس وتربية وبيلوجيا وغيرها

يعني شغلة محتاجة ملايين الملايين

.

.

مشكلتي انه ماعندي اطلاع على اخر ماتوصل اليه العلم بهالمجال

هل الي قاعد يطورونه شباب يأجوج ومأجوج باليابان يعتمد على نفس الأساسيات الي تكلمت عنها ولا شغلهم يعتمد على تكنلوجيا ثانية كلش ؟؟ـ

هل في مجال اني اتخصص بهالموضوع والقى دعم وتشجيع في بلدي ؟؟ـ

.

عاد من قبل لا ادخل الجامعة وانا بخاطري اتخصص بالالكترونيات والروبوتات لكن لاني اعتقد ان مالها مستقبل بالديرة اقنعت نفسي بمجال الاتصالات

.

الحين حده حده ودي ادرس بهالمجال

باجر افتح مصنع العاب روبوتية بمدينة الحرير

يعني ايمع بيزتين افتح فيها مركز علمي لابحاث الذكاء الاصطناعي والروبوتات

.

.

تهقون في مجال يصير شي من هالخرابيط

.

.

عن نفسي اعتقد ان هالبوست دليل قاطع على اني خرفت !!ـ

خاصة اني بعد ماسرحت بخيالي المزاج صار ولا احلى !!ـ

ومع هذا بحاول اذا سنحت لي فرصة اسوي بحث بالنت عن هالموضوع

الي يقدر يفيدنا بمراجع الكترونية نكون له من الشاكرين !!ـ

وآسف إذا مافهمتوا شي .. حاولت اشرح كثر ما اقدر لكن متكيسل الون البوست واحط رسوم توضيحية خاصة وان ورانا فاينلز وللحين مادرست شي .. خل احلام اليقضة تنفعني :)ـ