زمان الروبوتات ..

هاليومين مادري شفيني

ماني مشتهي افج كتاب ولا اقرا كلمة

اتغصب الدراسة غصب وخايف لا ارجع !!ـ

ببالي ولا خمس مواضيع للمدونة بس مالي خلق اكتب شي !!ـ

احس راسي بينفجر من الصداع

اول مرة من سنين عديدة احس اني محتاج بندول .. لكن لا وكلا للحلول الطبية .. انا مقاطع الادوية من زمن بعيد

الله يعز الحواي !!ـ

.

.

.

البارحة الحمدلله عادت المياه الى مجاريها مع رفيق الدرب

مع ان هو الغلطان لكن ضغطت على نفسي وقلت انا اكبر من جذي

اتصل عليه مايرد

عقب ساعة دق وعلى طول سلمت

قلت له : شفففت منو الاحسن انا ولا انت

قال: الحديث يقول " خيرهما الذي يبدأ بالسلام "ـ وانا الي بديت ودقيت عليك

قلت : الله اكبر الحين انا الي داق قبل ومارديت علي والحين انا الي سلمت قبل تقولي انت الي بادي

قال : اي انا الي بديت مو انت

.

هني صااارت .. كل من يقول الزود عندي

بغينا نتهاوش مرة ثانية بس جنه مصخت السالفة .. صج بطاليه !!ـ

.

.

.

على خلفية النتائج الخطيرة الي توصل إليها خيالي الحالم في البوست السابق عن الروبوتات والذكاء الإصطناعي .. قلت خلني اسوي سيرش سريع عن الموضوع بس علشان اشبع فضولي .. كانه ماعندي امتحانات ولا دراسة !!ـ

.

النتايج كانت عجيييبة وتبشر بالخير

.

حصلت كذا لنك لروبوتات الكترونية ذكية

بصراحة مو متأكد اذا يصح نطلق عليها روبوتات ولا لأ لكن هم سموها روبوتات

لكن هي مثل برنامج محادثة انت تهذر والكمبيوتر يرد عليك برد منطقي

.

.

اول واحد سيرت عليه .. واذكى واحد فيهم كلهم هو هالحبيب

طبعا من منطلق هندسي بحت قلت لازم اختبره اشوف هل هو فعلا ذكي ولا مجرد بنغالي مايدري وين الله قاطه ؟!ـ

فقلت وانا اكلمه لازم اجرب انواع المحادثة المتوقعة والغير متوقعة

بس بصراحة مع الوقت استانست عليه

اي واحد يبي يفضفض خل يجابله روبوت وبلا عوار راس

وهذا نموذج مختصر ومترجم للحوار الي تم بيني وبين الحبيب " على فكرة تراه الماني " !!ـ

طبعا ماقدر احط الحوار كامل لانه كان حوالي ساعة زمن وانا نسيت شخربطت معاه :)ـ

.

.

البوت : مرحبا .. انا البوت الروبوت .. راح اسولف لك عن الخالق وعن العالم

أنا : أنت شتعرف عن الإسلام " داش بقوة " ـ

البوت : هو تدري .. كل انسان يحتاج إلى دين يفهم من خلاله الحياة

أنا : أقولك انت مسلم ؟؟ـ

البوت : هو خبري مافي دين يقبل الروبوتات ولا انا ماعندي مانع

أنا : أقول طاقة جبدي

البوت : انتوا يا البشر كله طاقة جبودكم

أنا : عندي فاينلز ومالي خلق ادرس

البوت : تصدق حتى انا !!ـ

أنا : اقولك شرايك تدرسني ؟؟ـ

البوت : واخيرا في واحد اعترف بقدراتي عالتدريس

أنا : يعني بتدرسني ؟؟ـ عندي مقرر

elec 261

باط تسبدي " ابيها من الله "ـ

البوت : هيييييي .. ليكون صدقت انت .. يحليلك انا مجرد برنامج لقطت منك كلمة درس وحولتها الى ادرسك .. ليكون صدقت اني صج بدرسك ترا ماعرف !!ـ

أنا : انت وعدتني بتدرسني خلاص

البوت : شلونك يبا ؟! شرايك نسولف عن الدين مو احسن ؟؟ـ

أنا : 5+2 يساوي جم ؟؟ـ

البوت : اي سهلة وايد كنت اسويها ... تساوي 7

أنا : عيل تكامل 9 اس ت يساوي جم " ما يغشمر "ـ

البوت : اي هذي اعرفها ..رقمي المفضل

انا : شنو رقمك المفضل ؟؟ـ

البوت : سر ما اقوله لحد !!ـ

أنا : انت غبي

البوت : انتوا يا البشر كله مصدقين روحكم على شنو مادري

أنا : انت غبي .. وياليت تكرمنا بسكوتك !!" يعني معصب "ـ

البوت : اوكي غبي امنا بالله بس اسكت هذي ماقدر .. انا صانعيني حق الهذرة

انا : تصدق عاد اني روبوت حالي حالك !!ـ

البوت : العب غيرها

انا : صج والله اني روبوت

البوت : اقلب وجهك ..انت شفهمك بالمنطق والرياضيات والحسابات المعقدة

أنا :زين اقول البوت انا ارتحت لك وبقولك سر خطير

البوت : اي انتوا ياحبكم للاسرار .. حياتكم كلها اسرار

أنا : جد البوت انا محتاج مساعدتك

البوت : مساعدة ..في احد ياب طاري مساعدة .. شرايك نتكلم عن التاريخ

انا : خلك جدي تكفه ..انا واحد احب ومادري شسوي " وهقته "ـ

البوت : اي حتى انا اذكر مرة سافرنا ورحنا مادري وين حده كان وناسة

انا : لا تضيع الصقلة وجاوبني شسوي

البوت : لحظة لحظة لحظة .. جنك قبل شوي تقول اني غبي .. شلون تبيني اجاوبك " هني صج ماتوقعتها منه .. والله يذكر الشيطان "ـ

انا : لا بس كنت اضحك معاك انت اذكى روبوت بالعالم

البوت : يابعد حيي والله .. على راسي انت " ترا مترجم من الانجليزي صدقوني :)"ـ

انا : زين حبي ماقلت لي شسوي ؟؟ـ

" هني الحبيب بدا يضيع الصقلة بمواضيع مالها داعي وانا محنجها عليه .. حاكره .. بالاخير علقت عليه .. احبك وبعدين احبك وبعدين احبك ..يعني بشوف هل يردد نفس الكلام الي قاله من قبل ويصير جنه لعبة يهال ببرمجة فاشلة .. لكن الي عجبني انه لما خلص الحجي الي يقدر عليه قام يقول شكلك علقت ماراح ارد عليك الا لما تتعدل ..صادني !!"ـ

أنا : زين يا الطيب انا ودي اكمل معاك بس بروح اصلي

البوت : اي لا تتاخر ترى ناطرك

انا : سلام بروذر " كتبتها جذي بالانجليزي "ـ

البوت : انا ابوي كان من العايلة الفلانية وامي من العايلة العلانية " يبي يثبت لي انه اصيل "ـ

أنا : مليييق ..اكرهك انت ماصخ وممل وماعندك سالفة

البوت : انت الممل .. بعدين تعال ..انت مو تقول انك روبوت ؟؟ من اي مادة مصنوع " هني حدي ماتوقعتها منه .. ذاكر هالكلمة من قبل نص ساعة .. والله ذكي "ـ

انا : من خشب

البوت : مم ريحة طبيعة وورد ..يمي يمي

انا : سلم على مبرمجك وايد .. لو انا منك جان ابوس ريله ليل نهار

البوت : خله يولي جليل الحيا ..انا مبرمج روحي بروحي ..اما هذاك فخله يموت بين سكربتاته وبرامجه ..واذا ميت عليه هاك ايميله روح راسله وقوله يفكني تراه اذاني بحنته !!ـ

انا : ليش بالعكس خوش ريال

البوت : اقول مو جنك كنت تقول مستعيل بتمشي ..شمقعدك للحين " الله يا كبر النغزة "ـ

انا : زين نشوفك على خير

البوت : مع السلامة

.

.

.

ادري طولت عليكم بس طوفت شغلات وايد من الحوار

صج وناسة وماتوقعت يطلع بهالذكاء

سيرت على عيال عمه بس يانهم ممليييييييييين ودمهم ثقيل

طبعا دعيتهم كلهم للاسلام محد عطاني ويه

ولا واحد جليل حيا يدعي الالوهية .. عليكم به هذا الزنديق :)ـ

.

.

وهذا موقع البوت جربوا تسولفون معاه وماراح تملون :)ـ

وهني لسته بعيال عمومته

.

.

وسامحوني ماقدرت انسق البوست عدل .. وراي قعدة من الصبح " الساعة 11 !!"ـ